SEO კოპირაითინგი – ყველაფერი, რაც უნდა იცოდეთ

რატომ არის SEO კოპირაითინგი ასეთი მნიშვნელოვანი?

როგორც უკვე ვახსენეთ, კარგი კოპირაითინგი SEO ოპტიმიზაციის პროცესში უმნიშვნელოვანესია – სწორად შედგენილი ტექსტები გვეხმარება, ერთნაირად საინტერესო ვიყოთ როგორც მომხმარებლისთვის, ისე საძიებო სისტემებისთვის. 

უფრო მარტივად გასაგებად წარმოიდგინეთ ასეთი სიტუაცია – გვაქვს ორი ბლოგი. ორივე ერთსა და იმავე თემას ეხება – მაგალითად, როგორ დავწეროთ წარმატებული LinkedIn პროფილი. ორივე პოსტი დაწერილია შესაბამისი საკვანძო სიტყვებით, ორივეში გამოყენებულია საჭირო ტეგები, სწორად შერჩეული URL, მეტა აღწერა – ყველაფერი, რასაც წესით SEO ითხოვს.

მაგრამ ერთ-ერთი – ტექსტი A – დაწერილია უბრალოდ „რაღაც ტექსტის“ პრინციპით. ტექნიკურად სწორია, მაგრამ არანაირ ემოციას არ იწვევს. არც სტილი აქვს გამორჩეული, არც მკითხველის ჩათრევაზეა ორიენტირებული.

მეორე – ტექსტი B – ასევე SEO-ს წესებითაა დაწერილი, მაგრამ აქ ტექსტი გაცილებით მეტს ამბობს. ის ნამდვილად „ლაპარაკობს“ მკითხველთან. ტექსტი ჩაგითრევს პირველივე აბზაციდან, იწვევს ემოციას, აღძრავს ცნობისმოყვარეობას და არ გაძლევს საშუალებას, უბრალოდ დახურო გვერდი.

და სწორედ აქ იწყება განსხვავება.

მეორე ტექსტი დააგროვებს ბევრად მეტ უკუკავშირს – უფრო მეტ ბმულს სხვა საიტებიდან, გაზრდილი იქნება CTR (“დაკლიკვის” სიხშირე), ვიზიტორები უფრო დიდხანს დარჩებიან გვერდზე (დროითი ჩართულობა – dwell time), გაიზრდება გაზიარებები სოციალურ ქსელებში და კომენტარების რაოდენობაც.

რაც ნიშნავს მხოლოდ ერთს – საბოლოოდ, B გაასწრებს A-ს Google-ის რეიტინგში, მიუხედავად იმისა, რომ ტექნიკურად ორივე „სწორად“ იყო დაწერილი.

ეს არის სწორედ SEO კოპირაითინგის ძალა. თუ მხოლოდ SEO იცი – კარგად პოზიციონირებული ტექსტის დაწერას შეძლებ, თუ მხოლოდ კოპირაითინგი იცი – შეძლებ, რომ ტექსტი იყოს შთამბეჭდავი და ყურადსაღები. მაგრამ როცა ორივე გაქვს, შენ ხელშია იარაღი, რომლითაც შეძლებ სხვების დაჩრდილვას ყველაზე კონკურენტულ ნიშებშიც კი.

სწორედ ეს გააკეთა Backlinko-მაც. როდესაც ეს პლატფორმა პირველად გამოჩნდა, SEO თემატიკაზე კონტენტი მეტწილად ტექნიკური და მშრალი იყო. მხოლოდ ალგორითმებზე იყო ორიენტირებული. მაგრამ Backlinko-მ გადაწყვიტა სხვაგვარად ემუშავა. აქ კონტენტი იყო SEO-ზე მორგებული, მაგრამ თან ადამიანებისთვის დაწერილი – საინტერესო, შთამაგონებელი, ჩამთრევი. სწორედ ეს ბალანსი გახდა მათი სწრაფი წარმატების ერთ-ერთი მთავარი მიზეზი.

ასე რომ, როცა ვსაუბრობთ SEO კოპირაითინგზე, უნდა გვესმოდეს – ეს არ არის უბრალოდ ტექსტი Google-ისთვის. ეს არის ციფრული კომუნიკაცია – ჭკვიანურად, სტრატეგიულად და ადამიანურად შედგენილი.